युक्रेनवरून तणाव

आपल्या पूर्वग्रहाला पचत नाही असे काहीही दिसले कि ते खोटे, आम्हाला हे आधीच ठाऊक होते, किंवा त्रिकालदर्शी पुतीन ह्यांना हे आधीच ठाऊक असून त्यांनी ह्याच्यासाठी आधीच कुठली तरी ४डी खेळी खेळून ठेवलीय जी आणखीन महिन्याने दिसेल, सर्वच मंडळी खोटारडी, इतर सर्व पूर्वग्रहदूषित, नाटो मूर्ख पण सर्वाना कंट्रोल करण्याची आश्चर्यकारक क्षमता आहे, नाटो ला हेच हवे होते पण आता त्यांना पाहिजे ते मिळाले तोच त्यांचा पराभव, पुतीन मुद्धाम आपले सैन्य ढिसाळ असण्याचे नाटक करत आहेत, त्यांच्याकडे ४००० विमाने आहेत पण ते मृदुहृदयाचे असल्याने आपली बी टीम ला पाठवत आहेत, बातम्या वाचून लिहणार्यांना युद्धाचे डावपेच काय ठाऊक ?, युक्रेनी फौज नागरिकांच्या घरांत लपून असल्याने अतिशय निरुपायाने रशियन सैनयाला इस्पितळ वगैरेवर हल्ला करावा लागतो, अश्या प्रकारच्या निरर्थक मस्तिष्कशार्विका प्रमाणे पसरलेल्या टीकेला काय म्हणून प्रत्युत्तर द्यायचे ? बहुतेक टीका ही शेवटी चक्राकार तर्कांच्या सदरात मोडते. त्याला प्रत्त्युत्तर देणे म्हणजे भिंतीवर डोके आपटणे. * मी सांगते तेच काही सत्य आहे आणि इतरांचे सर्व म्हणणे खोटे आहे असे मी कुठेही लिहलेले नाही. उलट लोकांनी प्रतिवाद केला आणि त्याच्यासाठी विपुल पण अर्थपूर्ण लेखन केले कि वाचायला आनंदच होतो. * विविध बातम्या माहिती मी देते ते मराठीतून विविध प्रकारची माहिती लोकांना मिपा तसेच इतर प्लॅटफॉर्म वर उपलब्ध व्हाव्ही म्हणून. आधीच सांगितल्याप्रमाणे मला ह्याचे पैसे मिळत नाही, आणि मिळत असते तर आनंदाने घेतले असते. * युद्धाच्या धुक्यांतली कुठलीही बातमी शेवटी संशयास्पद नजरेनेच पहिली पाहिजे ह्याचा अर्थ सर्वच माहिती खोटी आणि विशेष म्हणजे आपल्याला पचत नाही ती बातमी इतरांची आत्मवंचना किंवा काही तरी महा कौटिलीय खेळी जी माझ्या सारख्या पामरांना समजत नाही असे नाही. * एकूणच रशिया, युक्रेन इत्यादी विषयावर इथे अक्षरशः हजारो शब्दांचे लेखन केले आहे. बहुतेक लेखन "बातमी" ह्या सदरांत न मोडता वैचारिक लेखन आहे. उगाच कुठले तरी लिंक देऊन हे पहा असे म्हटले नाही. हे लेखन कुणा इंटरनेट वरील अनोळखी व्यक्तीला चुकीचे ठरविण्याच्या आनंदासाठी नाही केले. मराठी वृत्तपत्रांत किंवा इतर साहित्यांत क्वचितच मांडले जाणारे मुद्दे मांडावेत आणि भविष्यांत इतरांना ते सापडावेत ह्या उद्धेशाने केले आहे. रशिया किंवा युक्रेन च्या मळ्यांतली भाजी मी खाते म्हणून नाही. * माझ्या अत्यंत जवळचे आणि ओळखीच्या व्यक्ती युद्धांत अडकलेल्या होत्या/आहेत. त्यांची उध्वस्त घरे, त्यांच्या जाळून टाकलेल्या शाळा आणि विशेष म्हणजे सध्या त्यांची मानसिक अवस्था पाहून हे युद्ध लवकर संपावे असे वाटते. * नैतिक दृष्ट्या माझे मत अगदी साफ आहे. युद्धांत रशियाची चूक असून पुतीन ह्यांना जबाबदार ठरविण्यात आणि शिक्षा करण्यात इतर जगाला यश आले तर त्याचा आनंदच होईल. असे होण्याचा इतिहास कमीच असला तरी पहिल्यांदाच पुतीन हे आपल्या पतनाच्या इतके जवळ आले आहेत. * युद्ध सुरु होण्याच्या खूप आधीच मी ह्या विषयावर लेखन सुरु केले होते. तेंव्हा लोक फक्त "नॉर्दस्ट्रीम २" चा विषय चघळत बसले होते, मग अमेरिका उगाच खोट्या अफवा पसरवत आहेत असा प्रचार सुरु झाला. चिल्लर पैश्याची गॅस लाईन रोखण्यासाठी अमेरिका हे खोटे आरोप करत आहे आणि पुतीन बिचारे फक्त तेल आणि गॅस विकायला पाहत आहेत असा समज पसरवला जात होता. नंतर खरोखरचे युद्ध सुरु झाले तेंव्हा पुतीन ह्यांची सेना युक्रेन, नाटो वगैरे थपडा लावून युक्रेनी राष्ट्राध्यक्षांना रडवेल आणि मग हे पळून वगैरे जातील असली आत्मवंचना सुरु झाली. त्यानंतर नाटो युक्रेन ला पाण्यात सोडून आपण गुपचूप आपल्या कामाला लागतील अशी आत्मवंचना सुरु झाली. आता सध्या पुतीन ह्यांना निर्बंध वगैरे सर्व आधीच ठाऊक असल्याने त्यांना फिकर पडत नाही पण अमेरिकेतल्या कुठल्यातरी शुल्लक फंड ने तिथे चिल्लर गुंतवली होती ती शून्य झाल्याने अमेरिका हादरेल अशी आत्मवंचना सुरु झाली आहे. * युद्ध सुरु होण्याच्या आधीच मी भाकिते व्यक्त केली होती. त्यांत रशियन सैन्य ढिसाळ आहे हे प्रमुख होते. त्यावेळी कुणीही ह्याची अपेक्षा केली नव्हती. युद्धाचे बिगुल वाजण्याच्या आधी बेलारूस मध्ये ज्या बातम्या प्रकाशित केल्या होत्या त्यावरून मी ते भाकीत व्यक्त केले होते. ते आता बऱ्यापैकी सामान्य न्यान झाले आहे. * क्यिव ७२ तासांत रशियाच्या ताब्यांत येईल हे माझे भाकीत सपशेल चुकीचे ठरले. त्याचा सुद्धा आनंदच आहे. कारण सैन्य ढिसाळ असले तरी इतके ढिसाळ असेल असे वाटले नव्हते. टीप : मी पोट तिडकीने लिहिते ह्याचा अर्थ मला अमुकच एका प्रकारच्या परिमाणाची खूप अपेक्षा आहे असे नाही. आणि असली तरी मी काही लिहून ते साध्य होणार नाही.