जे न देखे रवी...

पडघम

अ — अनन्त्_यात्री,

अनाम तार्‍याच्या गर्भीचे
ऊर्जा वादळ लवथवणारे
उधळून देते विस्फोटातून
विकीरणांचे पिसाट वारे

दुबळी दुर्बिण अधांतरातून
अनंतात डोकावून बघते
सर्वव्यापी, निर्लेप, अनादि
स्थळकाळाचे चित्र रेखिते

आतशबाजी अवकाशातील
निरभ्रातुनी मला खुणविते
भव्यत्वाचे क्षुद्रत्वाशी
अबोध नाते अधोरेखिते

अज्ञाताचा अदम्य रेटा
परतविण्याचे प्रयत्न माझे
थिटेच ठरती, रोमरोमी मग
कुतूहलाचा पडघम वाजे

| 1522 वाचन |
💬 प्रतिसाद
च
चौथा कोनाडा Sat, 11/26/2022 - 15:57 नवीन
दुबळी दुर्बिण अधांतरातून अनंतात डोकावून बघते सर्वव्यापी, निर्लेप, अनादि स्थळकाळाचे चित्र रेखिते व्वा, क्या बात है... सुंदर आतशबाजी अवकाशातील निरभ्रातुनी मला खुणविते भव्यत्वाचे क्षुद्रत्वाशी अबोध नाते अधोरेखिते एक नंबर! बहोत खूब! ही भव्य दिव्य कविता आवडली,
B
Bhakti Sat, 11/26/2022 - 16:17 नवीन
कधी कधी वाटतंच अनंताच्या आपण एक ठिपका आहोत.
प
प्राची अश्विनी Sun, 11/27/2022 - 11:41 नवीन
वाह! भव्यत्वाचे क्षुद्रत्वाशी अबोध नाते अधोरेखिते... क्या बात!
ज
ज्ञानोबाचे पैजार Sat, 12/03/2022 - 03:59 नवीन
भव्यदिव्य नादमय कविता आवडली पैजारबुवा,