वजिर सुळका ट्रेक.

ठाणे जिल्ह्यातील 'माहुली' हा किल्ला ट्रेकर्ससाठी एक आवडता ट्रेक आहे. त्यातही तो मुंबईकरांना जवळ. मुंबई-नाशिक राष्ट्रीय महामार्गाला लागून असलेला हा गड त्याच्या सुळक्यांसाठी प्रसिद्ध आहे. त्यातीलच एक सुळका म्हणजे 'वजीर' सुळका. माहुली गडाचा पसारा हा दक्षिण उत्तर असा पसरला असून त्याच्या दक्षिणेला अनेक सुळके आहेत. यातील सगळ्यात शेवटचा सुळका म्हणजे वजीर. माहुली किल्ल्याचाच भाग असला तरी वजीर सुळक्याचा ट्रेक हा माहुली किल्लयाच्या ट्रेकपासून पूर्ण वेगळा आहे. तसेच, वजीर ट्रेक हा तुलनेने खूप सोपा ट्रेक आहे. मुंबईपासून पन्नास किमीवर असलेला हा ट्रेक पटकन करण्यासारखा तसेच नव्या ट्रेकर्ससाठी एक चांगली सुरुवात आहे. तसेच छोटा असला तरी तो सुंदर मात्र नक्की आहे. ट्रेकची सुरुवात नंदिलकेश्वर या मंदिरापासून होते. तिथे पिण्याचे पाणी तसेच निवार्याची सोय होऊ शकते. अलीकडेच मी दोनदा या ट्रेकला जाऊन आलो. पहिल्या फेरीला खूप पाऊस होता आणि दुसऱ्या फेरीला उन्हाने भाजून काढले. या दोन्ही ट्रेकचा व्हिडीओ क्लिप्स मिळून एक व्हिडीओ तयार केला आहे. मी पहिल्यांदाच ट्रेकिंग व्हिडीओ बनवला असून व्हॉईसओव्हर एडिटिंग करताना स्टुडिओत दिला आहे.