खरी वाटते, पूरी वाटते

खरी वाटते, पूरी वाटते, जवळ असून ती दूरी वाटते भितो तुला मी, नको मजवरी ऐशी रागावूस प्रिये क्षणभर समशेरीसम मजला तुझ्या हातची सूरी वाटते हरेक सुंदरी समोर असता, हीच फक्त माझ्यासाठी पण हवेत विरते, कणी न उरते, जातच ही कर्पूरी वाटते सारे लिहिले, तारे लिहिले, शेवट ना परी मनासारखा तुझे नाव टाळतो म्हणूनच गोष्ट जरा अधुरी वाटते तू असताना सुचे न काही, आठवांनी पण भरे वही काय करू मी? हाय! तुझ्याहून याद तुझी कस्तुरी वाटते सखे आज तू मला तुझे नि गगनाचे या नाते सांग कशी तुझ्यासोबत असताना , सांज अजून सिंदूरी वाटते कानामध्ये रुंजी घालत आहे अजून होकार तुझा आता वाजू दे काही मजला ती कृष्णाची बासुरी वाटते काय तुझी एकेक अदा.. जग होय फिदा त्यावरी परी हृदयतोडीतील सहजपणाची अदा थोडीशी बुरी वाटते -विशाल (०७/११/२००९)