मिश्र डाळींची भजी

मुसळधार पावसात किवा बाहेर स्नो फॉल होत असताना गरम गरम भजी म्हणजे क्या कहने? तर पेश आहेत ही मिश्र डाळींची भजी.. मूग डाळ, हरबरा डाळ आणि उडीद डाळ एकेक वाटी असे समप्रमाणात घ्या. त्या एकत्रच भिजत घाला. ७ ते ८ तास भिजवा. म्हणजेच संध्याकाळी भजी हवी असतील तर सकाळी डाळी भिजवा. दुपारच्या जेवणात किवा ब्रंचला हवी असली तर रात्री डाळी भिजत घाला. वाटताना त्यात दोन तीन मिरच्या, लसणीच्या २-३ पाकळ्या आणि आल्याचा लहानसा तुकडा घाला. मिरच्यांचे प्रमाण आपापल्या तिखट पणाच्या आणि मिरच्यांच्या आवडीनुसार ठरवा. मी दोन मिरच्या घेतल्या. कमीत कमी पाणी घालून वाटा. ह्या वाटणात एक लहान कांदा बारीक चिरून घाला. कोथिंबिर चिरून घाला आणि चवीनुसार मीठ घाला. तेल तापत ठेवा. तापलेल्या तेलाचे चमचाभर मोहन त्यात घाला. मध्यम आचेवर भजी तळा. आल्याच्या गरम चहाचे घुटके घेत, बाहेरचा पाऊस किवा स्नो बघत ही भजी खा, :) किवा १८० अंशावर ए फ्रा ५ मिनिटे प्रि हिट करा. बेकिंगपेपरचे छोटे तुकडे करा व त्यावर सांडगे घालतो तशी भजी घाला व ए फ्रा मध्ये ठेवा. ४ मिनिटानंतर बाजू पालटून बेकिंग पेपर काढून टाका, तेलाचा हात लावा व परत ५ मिनिटे ए फ्रा करा. कचोर्‍यांप्रमाणेच मुद्दाम दोन्ही पध्दतीने भजी करून पाहिली. नेहमी तळतो तशी भजी तर मस्त लागतातच पण ए फ्रा मधली भजीही तितकीच टेस्टी झाली होती. दोन्ही फोटो देते आहे. तेलात तळलेली भजी ए फ्रा मधील भजी