फणस पुलाव

साहित्यः बासमती तांदुळ अर्धा कि., एक मध्यम फणसाची कुयरी, एक वाटी ओले खोबरे, दहा-बारा लसूण पाकळ्या, अर्धा इंच आल्याचा तुकडा, एक वाटी दही, चार कांदे, एक तमालपत्र, दोन काड्या दालचिनी, ७-८ काळी मिरी, दोन चमचे जिरे, चार ओल्या मिरच्या, दोन मसाला वेलची, ओले काजूगर एक वाटी, दोन चमचे गरम मसाला, तूप, मीठ. क्रुती: तांदुळ धुवून निथळत ठेवावे. फणस चिरून वाफवून घ्यावा. कांदा उभा चिरावा. तांदुळ निथळले की तुपावर परतून दुप्पट पाणी व मीठ घालून दोन शिट्या करून घ्याव्यात. वाफ जिरली की भात ताटात पसरून गार करत ठेवावा. आले, लसूण, खोबरे थोडे पाणी घालून वाटून घ्यावे. कढईत तूप तापत ठेवावे. त्यात ओल्या मिरच्यांचे तुकडे, जिरे, काळी मिरी, तमालपत्र, वेलची, दालचिनी टाकावे.एक मिनीट परतावे. कांदा घालावा. पारदर्शक होईपर्यंत परतावा. वाट्लेले आले, लसूण, खोबरे घालून परतावे. दही घालून परतावे. गरम मसाला घालावा. चिरून वाफवलेला फणस आणि ग्रेव्हीच्या प्रमाणात मीठ घालावे. ग्रेव्ही पातळ वाटत असल्यास थोडा वेळ गॅसवर ठेवून दाट करून घ्यावी. काजूगर मिसळावे. आता मोकळा केलेला भात ग्रेव्हीत नीट मिसळून घ्यावा. कडेने तूप सोडून झाकण ठेवावे. दहा मिनीटे छान वाफ येऊ द्यावी. गरमागरम फणस पुलाव दही रायते किंवा सूप बरोबर वाढावा.