काही चीजाळलेले प्रयोग

त्याचं झालं असं की डॉमिनोजनी चीज बर्स्ट पिझ्झा चालू केला आणि आम्ही त्याच्या प्रेमातच पडलो.. एकावर एक वेगवेगळे पिझ्झे पोटात रिचवता रिचवता आमच्या ध्यानात आलं की हे प्रेम पिझ्झा या प्रकाराबद्दल निर्माण झालेलं नसून, तुकडा मोडताच त्याच्या पोटातून वाहत येणाऱ्या वाफाळत्या क्रिमी चीज बद्दल आहे. या साक्षात्कारातून आणि देशाभिमानातून एक कल्पना सुचली, की हे वाफाळते चीज भारतीय पदार्थांच्या पोटातून बाहेर पडले तर... आणि यातून साकार झाले... काही चीजाळलेले प्रयोग! प्रत्यक्ष लिखाण सुरु करायच्या आधी ही गोष्ट नमूद करावीशी वाटते की हे सारे नेहमीचेच पदार्थ आहेत; बदल आहे तो फक्त चीजचा! त्यामुळे साहित्य,कृती इ. तपशीलवार सांगत बसत नाही. वाचकांनी फक्त कल्पना समजून घेऊन बाकीचे पदार्थही करून बघावेत! अजून एक महत्वाची गोष्ट जी या सगळ्या पदार्थांना लागू पडते: पदार्थ गार झाल्यावर चीज पुन्हा घट्ट होते त्यामुळे हे सर्व पदार्थ गरम-गरमच भारी लागतात. प्रयोग १: चीज गार्लिक परोठा हा पदार्थ बऱ्याच पंजाबी हॉटेल मध्ये मिळतो. पण त्यांची करण्याची पद्धत वेगळी असते. हॉटेल मध्ये नेहमीचाच परोठा करून तो पूर्ण तयार झाल्यावर त्यावर फक्त वरून किसलेले चीज घालतात. पण अशा वरवर शिंपडलेल्या चीजमध्ये बर्स्टिंग चीजची मजा नाही! त्यामुळे आम्ही याचे नवीन रूप तयार केले. स्टफिंगसाठी लसूणपेस्ट(किंवा लसणाचे अगदी बारीक चिरलेले तुकडे) आणि चीज स्प्रेड (ते मोझोरेल्ला, पारमेझान वगैरे काही आम्हाला कळत नाय ओ.. अमूल चीज स्प्रेड बेस्ट बघा) हे एकत्र करून घ्यावे. आम्ही एका परोठ्यासाठी २ पाकळ्या लसूण आणि २ चमचे चीज स्प्रेड वापरले(याचे प्रमाण व्यक्तीगत आवडीनुसार बदलू शकते). परोठ्यासाठी कणकेची(आम्ही गव्हाचे पीठ वापरले, मैदाही चालेल) पोळी लाटावी. या पोळीच्या आत चीज आणि लसणाचे मिश्रण लावून घ्यावे आणि करंजीप्रमाणे घडी घालून बंद करावे. आणि तसेच तव्यावर तेल सोडून मंद आचेवर खरपूस भाजावे आणि गरम गरमच खावे. (भाजताना घ्यायची खबरदारी म्हणजे परोठ्याला जर भोक पडले तर त्यातून चीज बाहेर ओघळून तव्याचा सत्यानाश होतो, त्यामुळे सांभाळून!) प्रयोग २: चीज आप्पे आप्प्यांसारखे आप्पे हो! पण पोटात चीज असलेले. त्यामुळे एरव्ही आप्पे करताना जसे पीठ करतो तसे पीठ करावे. पात्राला प्रथम तेल लावून घ्यावे. आप्पे पात्रात निम्मा गोल भरेल एव्हढे पीठ घालावे. त्यात चीज क्यूबचा छोटा तुकडा (अंदाजे १सेमीx१सेमीx१सेमी) अलगद घालावा. तुकडा घालताना तो पात्राला लागणार नाही याची खबरदारी घ्यावी. आता वरून तो चीजचा तुकडा झाकला जाईल इतपत पीठ घालावे. आणि नेहमीसारखे तेल सोडून भाजून घ्यावेत. प्रयोग ३: चीज मसाला इडली इथेही वरच्या प्रमाणेच कृती: इडली पात्राला थोडे तेल लावून घ्यावे. ते अर्धे भरेल एवढे पीठ घालवे. त्यामध्ये चीज स्लाईसचा तुकडा घालावा. तो तुकडा झाकला जाईल एवढे पीठ घालावे. आणि नेहमीसारख्या इडल्या कराव्यात! आम्ही इडलीच्या पीठामध्ये चिरलेला कांदा आणि कोथिंबीर-मिरचीची पेस्ट घातली (पण ते ऑपशनल आहे). प्रयोग ४: चीज बॉल्स उकडलेल्या बटाट्यात तिखट मीठ घालून नीट मळुन घ्यावे. त्याच्या छोट्या छोट्या वाट्या कराव्यात. त्यात बारीक चिरलेला कांदा आणि मिरची भरावी आणि चीज चा छोटा(पुन्हा १सेमीx१सेमीx१सेमी) तुकडा ठेवावा. अलगद हातानी वाटी उचलून तिचा अगदी हलक्या हातानी बॉल बनवावा. पुरण पोळी करणार्यांना हे अगदीच सहज जमेल.. बाकीचे प्रयत्न करा :) कॉर्न फ्लोर आणि पाण्याचे सरसरीत (भज्यांच्या पिठापेक्षा पातळ) मिश्रण करून घ्या. त्यात तयार केलेला बॉल घोळवून डीप फ्राय करा. आपला चीज बॉल तयार आहे !! तयार चीज बॉल फोटो काढेपर्यंत संपून गेले. :P टीप: या सर्व पाकृसाठी चीज १५-२०मिनिटे आधीच फ्रीज मधून काढून ठेवा. म्हणजे छान चीज बर्स्ट इफेक्ट मिळेल!