मेथी मलई मुर्ग

नमस्कार मंडळी !! गेली अमुक अमुक वर्षं मी मिपा वाचतो आहे. अमुक अमुक अशासाठी म्हणलं कारण मी सदस्य तरी नुकताच झालो आहे पण पाहुणा म्हणून वाचनमात्र गेली अनेक वर्षं होतो. तर सांगायचं असं आहे की मिपा वरचं इतर साहित्य तर वाचनीय आहेच पण मी सगळ्यात जास्त इंटरेस्टनी वाचतो ते 'खाद्य' साहित्य !! मिपा वरच्या कित्येक पाककृती रेफर करून आता पदार्थ करणं आणि त्यांच्यावर प्रयोग करणं हा माझा आवडीचा छंद झाला आहे. त्यामुळं माझ्यासाठी मिपा वरचं पहिलं लेखन काय करावं असा प्रश्नच पडला नाही. खूप दिवस तोच तो कोल्हापुरी तांबडा-पांढरा, गावरान चिकन किंवा आमच्या बेंगलोरात मिळणारे (आंध्रा स्टाईल :P) चेत्तीनाडू आणि नेल्लोर चिकन खाउन(आणि करून) लई बोर झालं होतं. म्हणून काहीतरी नवीन करायची इच्छा होती. खूप तेलकट , चमचमीत, मसालेदार, तिखट असं काही करायचं नव्हतं. ओल्या खोबर्याचे वाटण आणि काजू ग्रेव्ही देखील टाळायचे होते. या सगळ्यात लहानपणी भाज्या खायला लावण्यासाठी आईने केलेल्या आयडिया आठवल्या. आणि थोडे फेरफार करून (आंतरजालावर बघून) जे काही तयार झालं ते...... मेथी मलई मुर्ग साहित्य चिकन १/२ kg मेथी १ मोठी पेंडी (कडू नाहीय ना याची भाजीवाल्या/ली कडंच खात्री करा) कांदे २ साधारण मोठे १ इंच आले (बारीक काप ) १ इंच आल्याची पेस्ट ४-५ लसुण पाकळ्या बारीक कापून १/२ चमचा लसुण पेस्ट फ्रेश क्रीम १/२ वाटी ४-५ हिरव्या मिरच्या (जास्त तिखट करण्याची इच्छा नव्हती तरी इच्छा असेल तर याचे प्रमाण वाढवता येईल) फोडणीसाठी बटर (तेल सुद्धा चालेल) मॅरीनेशन साठी दही १ वाटी मीठ १ चमचा हळद १/२ चमचा तमालपत्र २ पाने दालचिनी १ इंच मसाल्याचे वेलदोडे २/३ मिरी ४-५ १ चमचा साजूक तूप कृती पहिल्यांदा मॅरीनेशनचे साहित्य एका भांड्यात एकत्र करून त्यात चिकन घालुन नीट मिक्स करा. आता बाकीच्या साहित्याची जमवाजमव होईपर्यंत त्याच्याकडे बघू नका . (जर सामानाची जमवाजमव आधीच झाली असेल तर किमान १/२ तास त्या कोंबडीला तिच्या मसाल्या सोबत एकांतात सोडा) मेथी निवडून घ्या. त्यातली ३/४ मेथी बारीक चिरून घ्या. उरलेली १/४ पाने तशीच असू दे. कांदा साधारण चिरून घ्या (चिरलेला कांदा मिक्सर मधून काढायचा आहे तेंव्हा बारीक चिरण्याच्या फंदात पडू नका ). चिरलेला कांदा आणि मिरच्या मिक्सर मधून वाटून घ्या. कढईत चमचा भर तेल आणि तब्येतीनुसार बटर घाला (आधी तेल घातल्यामुळे बटर जळून घरभर धूर होत नाही). बटर वितळल्यावर त्यात लसूण सोनेरी (कांदा/लसुण परतताना हा सोनेरी रंग प्रत्यक्षात मला कधीच दिसला नाही... मी आपला चॉकलेटीलाच सोनेरी म्हणून टाकतो) रंग येईपर्यंत परता. त्यात आले-लसुण पेस्ट घाला व कच्चा वास जाईपर्यंत साधारण मिनिटभर परता. त्यात वाटलेली कांदा मिरची पेस्ट घाला. आता ही पेस्ट असल्याने नेहमीप्रमाणे 'सोनेरी' वगैरे रंग येणार नाही. तुम्ही आपले कच्चा वास जाईपर्यंत / तेल सुटे पर्यंत नाहीतर कंटाळा येईपर्यंत परता. हे झालं की मग ती चिरलेली ३/४ मेथी आणि १/४ मेथीची पाने कढईत घाला आणि मेथीच्या अंगचे पाणी सुटून आटे पर्यंत शिजवा. हे एवढं होईपर्यंत चिकन छान मुरलं असेल. ते त्याच्या सोबतच्या मसाल्यासकट आपल्या मेथीच्या भाजीत घाला. दह्यामुळे त्याला थोडंफार पाणी सुटलेलं असेलच. त्यामुळं जेमतेम पेलाभर पाणी घालून कढई वर झाकण ठेवा. आता ५ एक मिनिटं तरी तुम्ही ईकडं तिकडं फिरून येऊ शकता किंवा त्याला जोडीला काही रोटी / नान / चपाती बनवायचं असल्यास तिकडं लक्ष देऊ शकता. ५ मिनिटांनी झाकण उघडून बघा. जर बोनलेस चिकन किंवा छोटे तुकडे असतील तर आत्तापर्यंत बऱ्यापैकी शिजत आले असतील. चमच्यांनी थोडंस टोचून बघा. आणि जरुरीपुरत पाणी घालून आणखी २-३ मिनिटं वाफ द्या. मी लेग पीस वापरले होते. त्यामुळं मला शिजवायला जरा वेळ लागला. तुम्ही पण जर लेग पीस घेतले असतील तर अजून एक भांडंभर पाणी घाला आणि दहा मिनिटं परत शिजू द्या. १० मिनिटांनी लेग पीस पण साधारण शिजत आले असतील. चिकन बऱ्यापैकी शिजल्यावर त्यात अर्धी वाटी फ्रेश क्रीम घाला आणि छान मिसळून घ्या. आता थोडीशी चव घेऊन पाहायला हरकत नाही. आपण मॅरीनेशन करताना मीठ घातलं होतं. त्यामुळं आता चवीनुसार थोडंसं मीठ घाला. अजून २-३ मिनिटं शिजवा आणि मग सुरु करा खायला. मी ह्याच्यासोबत चीज गार्लिक पराठा केला होता. (प्रेरणा: डॉमिनोज चा चीज बर्स्ट पिझ्झा). हे कॉम्बीनेशन माझ्या अपेक्षेपेक्षा भलतंच झकास लागलं. गवताळ लोकं यात मुश्रूम, मटार, पनीर इ घालू शकतात. किंवा मेथीच्या भाजीचा नवीन प्रकार म्हणून नुसती ग्रेव्ही देखील झक्कास लागते.