चारोळ्यांचे रुचकर लोणचे.

(मा जागुतै यांची क्षमा मागून) साहित्य : दोन छटाक नवोदित मिपाकर (किंचित) कवी दोन चमचे यमके दोन चमचे चंद्र/ चांदणे/ पाऊस / आभाळ यापैकी आयत्यावेळी जे हाताला लागेल ते. काही लाडिक खरडी. एक चिमुट तरल भावना किंचित ठेचून. अर्धी वाटी तिखट प्रतिसाद पाव वाटी आंबट प्रतिसाद. २-३ गोग्गोड प्रतिसाद. (हे शक्यतो नवमिपाकरांचे असावे ) फोडणीसाठी बेताचे उपरोधिक प्रतिसाद. कृती : प्रथम नवोदित कवी लाडिक खरडीमध्ये घोळवून एक महिना मुरत ठेवावेत. या काळात आंबट तिखट प्रतिसादांचा अभ्यास करावा. यानंतर मुरलेल्या कवीच्या मिश्रणात ठेचलेल्या भावना चांगल्या मिसळून घ्याव्यात. मग पत्येक ओळीच्या शेवटी एक एक यमक पेरावे. अधून मधून चंद्र/ चांदणे/ पाऊस / आभाळ शिंपडावे. आता मिपावर प्रसिद्ध करावे. मग आंबट तिखट प्रतिसादांची आयती झणझणीत फोडणी त्यावर येऊन पडेल. आता ‘लाडिक खरडी’ वाल्यांना मध्ये मध्ये गोग्गोड प्रतिसाद पेरण्यास सांगावे. झाले रुचकर चारोळ्यांचे लोणचे तयार ! किमान पन्नास प्रतिसादांची ग्यारंटी ! वाढत्या प्रतिसादांबरोबर लोणचे अधिकाधिक मुरात जाते. टीप : राजकारणी धाग्यांमुळे आलेल्या अरुचीवर प्रभावी उपाय करणारे व तोंडास चव आणणारे आहे.