षड्रिपुनिर्दालन चुटकीसरशी केल्याचा दावा करणाऱ्या माझ्या दोस्ताने _ सोम्यागोम्याने _आपलं यश कायप्पा वर मला कळवलं
मग दसऱ्याचा मुहूर्त बघून मीही ठरवलं
आज षड्रिपुंचा नाश करायचाच वडिलोपार्जित_कोळीष्टकविभूषित_अहंभावरूपी म्यानातील_ बुद्धिरूपी तलवारीने
"काम" वधासाठी म्यानावगुंठित तलवार हाती घेतली
(म्यानाचा शेप .... आय हाय!)
"क्रोध" वधासाठी तलवार उपसू लागलो.
(निघेचना xxxx म्यानातून.... या तलवारीच्या....)
उपसेन तलवार तेव्हा पहिला "लोभाचा" खातमा करेन म्हटलं
(पण काही होवो..अशाच मुठीच्या आणखी दोन तरी तलवारी पायजेतच आपल्याकडे)
सप्पकन उपसलेली तलवार आता "मद" वधासाठी
वापरेन म्हणालो
(मी म्हणून उपसली ...शंभर जणांना पेलणार नाय ही असली जड तलवार)
"मोह" थोडा हार्ड आहे वध करायला म्हणतात
(त्यापायी इतकी मस्त तलवार तुटली तर पंचाईत व्हायची फुकट. जपून घाव घालायला पायजे)
"मत्सर" वध फार काय मोठा विषय नाहीये. जमणारच मला
(पण त्या xx xxxxसोम्यागोम्याला माझ्या अगोदर जमलंच कसं?)
मग आठवलं, अरे, दसऱ्याला तर शस्त्रपूजा करतात.
मग घेतली तलवार पुजायला.
बघू षड्रिपुनिर्दालन नंतर कधीतरी.