पणती

एक चिमुरडी पणती दिसली
रस्त्यावर पणत्या विकणारी
पाटी-पुस्तक-शाळेवाचुन
व्यवहारी गणिते शिकणारी

नऊ-दहा वर्षांची इवली
चंद्रकोरशी नाजुक, सुंदर
चतुर, कुशल संभाषण हसरे
व्यवहाराला परखड, कणखर

'ताई, काकू घ्या ना पणत्या
हलक्या, सुंदर, सुबक, टिकाऊ
शोभिवंत रांगोळीसाठी
दीपमाळ ही नवीन देऊ?

या पानांच्या आणि फुलांच्या
शंख-शिंपल्यांच्या, मोरांच्या
सोनेरी, रंगीत मण्यांच्या
वेगवेगळ्या आकारांच्या

खासच निवडुन देते सगळ्या
भाव नका पण पाडू खाली
आम्हां गरिबांच्या कष्टाचा
तुमच्यावाचुन कुठला वाली?

मोल असे माती-पाण्याचे
कलाकुसर अन् कौशल्याचे
स्नेह-वात घालाल तुम्ही तर
जीवन होइल साफल्याचे'

बोलुन गोष्टी चतुर, लाघवी
त्या पणतीने मने जिंकली
बघता बघता लहान-मोठ्या
पणत्यांची ती चळत संपली

पणतीच्या डोळ्यांत ज्योत अन्
मनात दीपावली उजळली
धन्य माउली आणि पिता ते
ज्यांनी पणती अशी घडवली!

क्रांति