नमस्कार मंडळी,
आपणा सर्वांना दिवाळीच्या हार्दिक शुभेच्छा!!
यंदाच्या फराळात हे कणकीचे लाडू करून बघा.
साहित्य:
- २ वाटी कणीक
- ३/४ वाटी तूप
- ३/४ वाटी पिठी साखर
- २ टीस्पून पोहे (जाडे किंवा बारीक)
- ७-८ बदाम बी (सजावटीकरिता)
कृती:
सर्वप्रथम पोह्यांचा चुरा करून घ्यावा.
थोडे तूप तव्यावर टाकून ते तापल्यावर त्यात पोह्यांचा चुरा खरपूस होईपर्यंत परतून घ्यावा.
पोहे बाजूला काढून अर्धी वाटी तूप तव्यावर तापवावे.
तूप तापल्यावर त्यात कणीक मिसळून मंद आचेवर भाजत राहावी.
१०-१२ मिनिटांत कणकीचा रंग सोनेरी होतो व खमंग वास येऊ लागतो.
या सर्व काळात कणीक हालवत राहावी जेणेकरून ती करपणार नाही.
रंग बदललेल्या कणकेत पिठीसाखर घालावी व ते मिश्रण एक दोन मिनिटे परतावे.
हे मिश्रण पातेल्यात काढून घ्यावे.
सुरुवातीला तुपात भाजलेला पोह्यांचा चुरा या मिश्रणात घालावा.
लाडू बांधण्यास सुरुवात करावी व गरजेनुसार अधिक तूप त्यात घालावे.
बांधलेल्या लाडवांवर बदाम बी किंवा त्यांचे काप लावावे.
