नमस्कार मंडळी! सर्वांना दिवाळीच्या खूप खूप शुभेच्छा! सगळ्यांकडे दिवाळीची तयारी झाली असेलच. दिवाळीचा फराळ काय काय बनवलात? लाडू, करंजी, चकली, शंकरपाळे, चिरोटे, अनारसे असतातच, पण एखादा नवीन पदार्थ केला जातोच.
या वेळेस मी केलीये बाकरवडी! तशा पुण्यात चितळे मामा, हलवाई काका, जोशी अशा अनेक चवीच्या बाकरवड्या मिळतात. पण सणानिमित्त घरी केलेल्या खमंग बाकरवड्या छान वाटतात.
साहित्यः
बाकरवडीच्या सारणासाठी लागणारे साहित्यः
सुक्या खोबऱ्याचा कीस १ वाटी
खसखस १/४ वाटी
तीळ १/४ वाटी
शेव १/२ वाटी (ऐच्छिक)
तिखट २ चमचे
काळा मसाला २ चमचे
ओवा १/२ चमचा
हळद १/२ चमचा
जिरे पूड १/२ चमचा
धने पूड १/२ चमचा
कोथिंबीर २ वाट्या (बारीक चिरलेली)
मीठ चवीनुसार
हिंग चिमूटभर
सारणाची कृती: तीळ्,खसखस्,खोबरे भाजून घ्यावे.भाजलेले तिन्हि पदार्थ मिक्सर मधून कोरडेच बारिक वाटून घ्यावे.
एका भांड्यात काढून त्यात कोथिंबीर,तिखट,मीठ,हळद,धने जिरे पुड,काळा मसाला,हिंग घालून एकत्र करून घ्यावे.
सारणाची कृती: तीळ, खसखस, खोबरे भाजून घ्यावे. भाजलेले तिन्ही पदार्थ मिक्सरमधून कोरडेच बारीक वाटून घ्यावे.
एका भांड्यात हे कोरडे वाटण काढून त्यात कोथिंबीर, तिखट, मीठ, हळद, धने-जिरे पूड, काळा मसाला व हिंग घालून एकत्र करून घ्यावे.
आवरणाचे साहित्य:
डाळीचे पीठ ३ वाट्या
मैदा १/२ वाटी
तिखट २ चमचे
हळद १/२ चमचा
तेल (मोहनासाठी) २ चमचे
मीठ
तळणीसाठी तेल
कृती : प्रथम डाळीचे पीठ, मैदा, तिखट, मीठ, हळद, २ चमचे तेल एकत्र करून मळावे.
या पिठाचे गोळे करून घ्यावे. त्याच्या थोड्या जाडसर पोळ्या करून त्यावर एकसारखे सारण
पसरून घ्यावे. आता या पोळीचे रोल करावे.
हे तयार रोल ढोकळ्याप्रमाणे वा चाळणीत खाली पाणी ठेवून १० ते १२ मिनिटे वाफवून घ्यावे.
वाफवून झाल्यावर हे रोल गार करावे. गार झाल्यावर रोलचे एकसारखे तुकडे करावे.
गरम तेलात बाकरवडी तळहातावर हलकेच दाबून (तळताना वडी सुटू नये यासाठी) सोडावी. मध्यम आचेवर खरपूस तळून घ्यावी.
खमंग, खुसखुशीत बाकरवडी तयार!
